ஜனவரி 20 2005
தராசு
கார்ட்டூன்
காந்தீய விழுமியங்கள்
பங்குச்சந்தை ஒரு பார்வை
மஜுலா சிங்கப்புரா
உன்னையறிந்தால் நீ உன்னையறிந்தால்
சமையல்
முத்தொள்ளாயிரம்
கட்டுரை
வ..வ..வம்பு
திரைவிமர்சனம்
 
  முதல் பக்கம்
தொடர்கள்
- சத்யராஜ்குமார்
  • ஹர்ஷத் மேத்தா
  • - சசிகுமார்
  • கங்கை இல்லாத காசி
  • - பாஸ்டன் பாலாஜி
  • வார்த்தையல்ல, வாக்கியம்
  • - என். சொக்கன்
  • என்னை எழுதியவர்கள்
  • - சத்யராஜ்குமார்
  • சுய சாசனம்
  • - பாஸ்டன் பாலாஜி
  • கோடிட்ட இடங்கள்
  • - சித்ரன்
  • களம்
  • - நாகூர் ரூமி
    யுனிகோடில் தேடல்
    சென்ற இதழ்கள்
    முத்தொள்ளாயிரம் : பாண்டிய நாட்டின் தலைவன்
    - என். சொக்கன்
    | Printable version |

    பாடல் 79

    பொதுவாகவே, பெண்களுக்குத் தங்கள் அழகில் பெருமை அதிகம்.

    ஆனால், காதல் வயப்பட்டுவிட்ட, ஆனால் காதலனைப் பிரிந்திருக்கும் பெண்களுக்கு, இந்த அழகு அலங்கரிப்புகளில் ஆர்வமின்றிப்போவதும் இயல்புதான், ஆகவே, 'எத்தனை அழகு இருந்தால் என்ன ? அவன் என் பக்கத்தில் இல்லையே.', என்னும் புலம்பல்களைக் கேட்கமுடிகிறது. இந்தப் பாடல் அந்த வகையானதுதான்.

    'உயரமான பனை மரத்தில், புதிதாய்த் தோன்றிய குரும்பைகள் / இளம் காய்களைப்போல, என் மார்புகள் அழகாய்த் திகழ்கின்றன.', என்று விவரிக்கிறாள் இந்தப் பாடலின் நாயகி, 'ஆனால், கூர்மையான தந்தங்களை உடைய யானைப் படையின் தலைவன், என் காதலன் பாண்டியன் என் அருகில் இல்லை.'

    'அவனைத் தழுவி, அவனுடைய மார்பில் அழுத்தமாய்ப் பதிந்து, அங்கிருக்கும் குளிர்ந்த சந்தனத்தில் என் மார்பகங்கள் தோயவேண்டும்., அது நடக்காதபோது, இவை எத்தனை அழகாய் இருந்துதான் என்ன பயன் ?'

    வாரிய பெண்ணை வருகுரும்பை வாய்த்தனபோல்
    ஏரிய ஆயினும் என்செய்யும் கூரிய
    கோட்டானைத் தென்னன் குளிர்சாந்து அணிஅகலக்
    கோட்டுமன் கொள்ளா முலை.

    (வார் - உயரம் / நீளம்
    பெண்ணை - பனை
    ஏர் - அழகு
    கோடு - யானைத் தந்தம்
    சாந்து - சந்தனம்
    கோட்டு - எழுது)


    பாடல் 80

    பாண்டிய நாட்டிற்கு அழகும், கம்பீரமும் தருவது வைகை ஆறு. ஆகவே, அங்கு வாழும் பிரஜைகள் எல்லோரும், வைகை ஆற்றைப்பற்றிப் பேசுகையில், மிகுந்த பெருமிதத்தையும், கர்வத்தையும் வெளிப்படுத்துவார்கள்.

    ஆனால், அந்தப் பாண்டிய நாட்டின் தலைவன், கொல்லுகின்ற யானைப் படைகளை உடைய பாண்டியனைக் காதலிக்கும் இந்தப் பெண்ணின் பேச்சு, வேறுவிதமாய் இருக்கிறது, 'இந்த வைகை ஆற்றினால் எனக்குப் பெரிய பிரச்சனை.', என்று புலம்புகிறாள் இவள் !

    ஏன் ? என்ன ஆனது ? அவளிடமே விசாரிக்கலாம்.

    'குளிர்ந்த நீரை உடைய இந்த வைகை ஆறைப் பார்த்ததும், அதில் குதித்து, ஆனந்தமாய் நீந்திக் குளித்து விளையாடத் தோன்றுகிறது.', என்கிறாள் அவள்.

    'இயற்கை எழில் கொஞ்சும் இந்த நீரோட்டத்தைப் பார்க்கும்போது இந்த எண்ணம் எல்லாருக்கும் தோன்றுவதுதானே அம்மா ? உன்னை யார் குளிக்கவேண்டாம் என்று தடுத்தது ?'

    'அடப் போங்கய்யா.', என்று சலித்துக்கொள்கிறாள் அவள், 'நான் இந்த நீரில் நீந்திக் குளித்தால், பாண்டியன்மீது உள்ள ஆசையில்தான் இப்படிச் செய்கிறேன் என்று என் தோழிகள் கேலி செய்து பேசுவார்கள்.'

    இதைக் கேட்டதும் நாம் திகைத்துபோகிறோம்., ஆனால், அவளுடைய பயம் நியாயமானதுதான் என்று புரிந்ததும், 'சரிம்மா, வைகை ஆற்றில் இன்னொரு தடவை உன் காதலனோடு சேர்ந்து குளித்துக்கொள்ளலாம். இப்போது நீ வீட்டுக்குத் திரும்பிச் சென்றுவிடு, அப்போதுதான் அந்தப் பெண்களின் கேலியிலிருந்து தப்பிக்கலாம்.', என்று அறிவுரை சொல்கிறோம்.

    'அதுவும் நடக்காது.', என்கிறாள் அவள், 'அப்போதும் இந்தப் பெண்கள் என்னை விடமாட்டார்கள்., பாண்டியன் மீதுள்ள என் காதலை மற்றவர்களிடமிருந்து மறைப்பதற்காகதான், நான் வைகை ஆற்றில் நீராடாமல், வீட்டினுள்ளேயே மறைந்திருக்கிறேன் என்று புரளி பேசுவார்கள்.'

    இப்படிச் சொல்லிவிட்டு, உற்சாகமற்ற குரலில் அவள் தொடர்ந்து பேசுகிறாள், 'அதான் சொன்னேனே, இந்த வைகை ஆறு எனக்குப் பெரிய பிரச்சனையாகிவிட்டது !'

    ஏற்பக் குடைந்துஆடில் ஏசுவர் அல்லாக்கால்
    மாற்றி இருந்தாள் எனஉரைப்பர் வேல்கண்ணாய்
    கொல்யானை மாறன் குளிர்புனல் வையைநீர்
    எல்லாம் எனக்கோ இடர்.

    (குடைந்து ஆடில் - தண்ணீரில் நீந்தி விளையாடினால்
    ஏசுவர் - திட்டுவார்கள் / பழிப்பார்கள்
    அல்லாக்கால் - இல்லாவிட்டால்
    வையை - வைகை)

    PROVIDER=MICROSOFT.JET.OLEDB.4.0;DATA SOURCE=D:\Hosting\7909944\html\unicode\db\TOcomments.mdb;Persist Security Info=False;
    உங்கள் கருத்து  
    (You may need to disable your pop-up blocking software in order to post a comment.)
    Copyright © 2005 Tamiloviam.com - Authors
    Best viewed with IE 4.x and above, Netscape 7.2, Firefox 0.8 and above with resolutions 800 X 600 and above.
    | Privacy |