தமிழோவியம் (http://www.tamiloviam.com)
தொடர் : 'அப்பச்சி' [பாகம் : 3]
- மீனா முத்து

ஊரில் (மெட்றாஸில்) இருந்து புறப்படும் அன்று ஹார்பருக்கு ஆச்சி (அக்கா ), அண்ணன் இருவரும் வழியனுப்புவதற்கு வந்திருந்தார்கள் அக்காவும் அவளின் மூன்றாவது குழந்தையையும் ( பிறந்து நாலு மாதம் தான் கொழு கொழுன்னு அழகோ அழகு ) தூக்கிக் கொண்டு வந்திருந்தாள் அவளுக்கு அப்பச்சியிடம் குழந்தையை காண்பிக்கணும்னு ரெம்ப ஆச ..

அப்பச்சியிடம் சொணங்காம சீக்கிரமா வந்து ஓம்மகள பாக்கச்சொல்லி சொல்லணும் அவுக இவளைப் பாத்தாகன்னா பொருக்கமாட்டாம( பெருமையா) சந்தோஷப் படுவாகன்னு ஆத்தா சொல்ல .. ஆச்சியும் ஆமா சீக்கிரம் வரச்சொல்லி சொல்லுங்க நாங்கள்ளாம் பாத்து வெகு நாளாச்சு , அப்பறம் நல்லபடியா போய் சேந்ததுக்கு எறங்கினவொடனே அப்பச்சியிட்ட சொல்லி தந்தி கொடுக்க சொல்லுங்க எங்களுக்கு நெனப்பெல்லாம் அங்கதான் இருக்கும் என்றாள் ,

அவளுக்கு நம்மளும் போக முடியவில்லையேன்னு ஏக்கம் . அண்ணன் அப்படியில்லை அண்ணன் ஸ்கூல் படிச்சதெல்லாம் மலேசியாவிலதான் அப்புறமா காலேஜில படிக்கி றதுக்குதான் ஊருக்கு வந்தாங்க அதனால அவர்களுக்கு இதெல்லாம் சாதாரணம் .

நாங்களும் ஏழெட்டு மாதம் முன்னாடியே புறப்பட்ருக்க வேண்டியது ஆத்தாவும் ஆச்சிக்கு புள்ளை பொறந்ததுக்கப்புறம் வாரோம்னு சொல்லி.. இப்பத்தான் போக முடிந்தது பாஸ்போட் எடுத்து ஒரு வருஷமாச்சு, போனா எப்பவோ போயிருக்கலாம் இப்பத்தான் தண்ணிபகச்சிருக்கு ( ஆத்தா எப்பவும் சொல்வார்கள்  நாம எங்க இருக்கோமோ அங்க தண்ணி பகையானாத்தான் அந்த எடத்தவிட்டு வேறு எடத்துக்கு போறாப்ல வரும் அது  வரை நாம என்னதான் முயற்சிச்சாலும் முடியாதுன்னு).

அன்னைக்கு ஹார்பரில் அழுதுகிட்டே ஆச்சி கீழே நின்னுக்கிட்டு கையை ஆட்டிக்கிட்டு டாட்டா சொல்ல நானும் ஆத்தாவும் மேலே கப்பலின் தளத்தில் நின்னு கையை அசைக்க எவ்…வளவு நேரம் !அப்பத்தான் மெது மெதுவா கப்பல் அசைய ஆரம்பிச்சது அட! கப்பல் பொறப்ட்ருச்சு !  அவ்வளவுதான் எனக்கு ஒரே அதிசயம்! கையை ஆட்டவும் மறந்து  நெஞ்சுவரைக்கும் இருக்கும் கைப்பிடியில் எக்கி கீழே   தண்ணியை தள்ளிக் கொண்டு கப்பல் நகந்து போவதை! வேடிக்கை  பார்க்க ஆரம்பித்து..  திடீருன்னு நினைவு வந்து திரும்பி பார்த்தா .. கையை ஆட்டி ஆட்டி காண்பித்துக்கொண்டிருக்கும் ஆச்சி ,அண்ணன் இன்னும் அங்கு சொந்தக்காரங்களை வழியனுப்ப வந்தவங்க எல்லாரும் சின்ன சின்ன உருவமா ! அதிசயமாப்   பார்த்துக் கொண்டே இருக்கும் போது  சின்ன சி ன்ன புள்ளியா ..! ஆத்தா... ன்னு ஏதோ சொல்ல திரும்புரேன் ஆத்தா கேவி கேவி அழுது கிட்டு மூக்கை சிந்திகிட்டு எனக்கு அழுகை அழுகையா வருது..

Copyright © 2005 Tamiloviam.com - Authors