Obama Care : யாருக்கு நல்லது ?

 

கடைசியாக உடல்நல பாதுகாப்பு மாற்றம் சட்ட ரீதியாக ஒப்புதல் பெற்றுவிட்டது. இதில் இருக்கும் முக்கிய மாற்றங்களை தெரிந்து கொள்ளும் முன் சில பயனாளர்களின் அனுபவங்களைத் தெரிந்து கொள்ளலாம்.
 
1. இந்தப் பெண் முழு நேர ஊழியர், வேலை பார்க்கும் போது அவரது நிறுவனம் மூலாமாக இவருக்கு உடல்நலக் காப்பீடு இருந்தது. அவருக்கு புற்றுநோய் என்று கண்டறிந்து அதற்காக சிகிச்சை மேற்கொள்ளலானார். சிகிச்சைக்கு செல்வதற்காகவும், உடல்நலம் குன்றியும் விடுப்பு எடுக்க, அதைக் காரணமாக்கி அவரை நிறுவனம் வேலையை விட்டு நீக்கியது. வேலை நீங்கிய நிலையில், COBRA மூலமாக காப்பீட்டை நீட்டிக்க முடியும் என்றாலும் அதற்கான கட்டணத் தொகையை கட்ட ஊதியமே இல்லாத நிலையில் முடியாமல் போனதால், காப்பீட்டை இழந்தார். ஊதியம் இல்லாதவருக்கான சில சலுகை விலை காப்பீடை பெற  முயற்சித்தால், ஏற்கெனவே புற்றுநோய் இருக்கிறது என்பதால் நிராகரிக்கப்படார். முடிவில் சிகிச்சை இல்லாமலே இறந்து போனார். இந்த உண்மை சம்பவம் இன்றும் அமெரிக்க புற்றுநோய்க் கழக இணைய தளத்தில் வீடியோ காட்சியாக இருக்கிறது.
 
2. நிறுவன ஒப்பந்தத்தில் அமெரிக்காவிற்கு மனைவியுடன் வந்தவர் இந்த ஊழியர். இவர் மனைவி H4 விசாவில், எனவே வேலை பார்க்க இயலாத நிலை. இவர்  H1 விசா இருக்கும் இந்தியர்களைப் போல ஒரு நிறுவனத்தால் பணிக்கு அமர்த்தப்பட்டு  இன்னொரு நிறுவனத்தில ( கிளையண்ட் நிறுவனம்) வேலை பார்ப்பவர்கள். இவர்களை பணிக்கு அமர்த்தும் பல contracting house போல, பிராஜக்ட் இருக்கும் வரைதான் வேலை, அதன் பிறகு அடுத்த பிராஜக்டிற்காக காத்துக்கொண்டிருக்கும் நிலையில் நிச்சயமாக காப்பீடு போன்ற சில சலுகைகள் இருக்குமா என்பது இவர்கள் பணிபுரியும் நிறுவனத்தை பொறுத்தது. ஆந்திராவில் இருந்து வந்து வேலை பார்த்துக்கொண்டிருந்த நண்பர், அது போல பிராஜக்ட் ஒப்பந்தம் நீட்டிக்கப்படாததால் வேலை இழந்தார். அத்தோடு காப்பீட்டையும் இழக்க வேண்டியதாகிவிட்டது. அவர் மனைவி வேலையும் பார்க்காத நிலையில் அதிக சேமிப்பும் இல்லாத நிலை. அவர் மனைவி கருவுற்றிருந்தார். என்னை அணுகிய இந்த நண்பருக்கு குறைந்த விலையில் / இலவசமாக கிடைக்க கூடிய காப்பீடுகளை முயற்சித்தேன். இந்த வருடம் ஊதியம் இல்லை என்றாலும், கடந்த வருடம் இவருடைய ஊதியம் $70,000 என்பதால், இவருக்கு அந்த காப்பீடுகள் கிடைக்கவில்லை. இன்னும் சில காப்பீடுகளில் இவர் மனைவி ஏற்கெனவே கருத்தரித்திருந்ததால் காப்பீடு நிராகரிக்கப்பட்டார். 
 
3. நான்காம் வகுப்பு படித்துக்கொண்டிருக்கும் போதே அந்த சிறுவனுக்கு நீரிழிவு நோய் என்று கண்டறியப்பட்டது. 18 வயதாகும் வரை பெற்றோர்களுக்குக் கவலை இல்லை. ஆனால் 18 வயது முடிந்த நிலையில் அவர் பெற்றோரை சட்டப்படி சார்ந்திருக்க முடியவில்லை. 18 வயதான பின் இளைஞர்கள் பெற்றோர்களைச் சட்டப்படி சார்ந்து இருக்க முடியாது, கல்லூரியில் முழுநேர மாணவர்களாக இருக்கும் வரை அவர்கள் கல்லூரி  உடல்நல மையம் வழங்கும் காப்பீட்டைப் பெற்றுக்கொள்ள முடியும். இங்கே இந்த மாதிரி ஏற்கெனவே நோய் இருக்கும் இளைஞர்களுக்கு முழு உடல் நலக் காப்பீட்டை பெறுவது கடினம்.  கல்லூரி கட்டணம் மிக அதிகமாகி விட்ட நிலையில் பல மாணவர்கள் பகுதி நேர வேலையும் பார்த்துக்கொண்டு படிக்கிற நிலையில் எப்படி காப்பீட்டிற்கும் கட்டணம் செலுத்த முடியும். இந்த மாதிரி 18 வயது முதல் 24 வயது வரை கவனிக்க முடியாமல் போகும் இளைஞர்கள் ஏராளம். 
 
4. இந்தப் பிரச்சினையை தீர்க்க ஒரு மாற்றம் கொண்டு வந்தார்கள். அதன் படி மாணவர்கள் முழுநேர மாணவராக இருக்கும் வரையில் அதாவது குறைந்த நிலையில் 16 க்ரெடிட் பாடங்கள் படிப்பவராக இருக்கும் வரையில் பெற்றோர்களின் காப்பீடில் சார்ந்தவராக முடியும் என்று. ஆனால் இங்கே உடல் நலம் குன்றியவர்கள் எப்படி முழுநேர மாணவர்களாக இருக்க முடியும்? அதனாலேயே காப்பீட்டை இழந்து அல்லல் பட்டவர்கள் அதிகம்.
 
5. 65 வயதுக்கும் மேலானவர்கள் மிகக்குறைந்த ஓய்வூதியம் பெறுபவர்கள் என்றால் medicare என்ற அரசாங்கம் நடத்தும் திட்டத்தில் சிகிச்சை பெற்றுக்கொள்ளலாம். ஆனால் அதைவிட சற்றே அதிகமாக ஆனால் மிக அதிகமாகவும் இல்லாத நிலையில் இருக்கும் 17 மில்லியன் பேருக்கு காப்பீட்டு கட்டணமும் செலுத்த முடியாமல் medicareம் இல்லாமல் அவஸ்தைப்படும் நிலை.
 
6. மருத்துவர் பரிந்துரைக்கும் மருந்துப்பொருட்கள் வாங்குவதும் வேலை இல்லாத நிலையில் அல்லது ஓய்வு பெற்ற நிலையில் மிகவும் கடினம். ஏதாவது ஒருமுறை சுரம் தலைவலி என்றில்லாமல் இரத்த அழுத்தம் நீரிழிவு, புற்றுநோய் என்ற தொடர் சிகிச்சை அவசியாமகக்கூடிய நோய்க்கள் இருந்தால் காப்பீடு இல்லாமல் மருந்துப்பொருட்கள் வாங்குவது வேலை இருந்து ஊதியம் பெறுபவர்களுக்கே மிகவும் கடினம் என்கிற நிலையில், காப்பீடே இல்லாதவர்கள் நிலை யோசிக்கவே கடினமான நிலை.
 
ooOoo
 
இப்படி பலதரப்பட்ட நிலையையும் கருத்தில் கொண்டே இந்த affordable care act கொண்டு வரப்பட்டது. இதன் மூலம் ஒவ்வொரு மாநிலமும் ஒரு மையம் ( exchange) நிறுவும். இந்த மையத்தில் மூலம் ஓவ்வொருவரும் தங்களுக்கேற்ற காப்பீடை சகாயமான விலையில் பெற்றுக்கொள்ள முடியும். ஏற்கெனவே இருக்கும் நோய்களைக் காரணம் காட்டி நிராகரிப்பட முடியாது. 26 வயதாகும் வரை இளைஞர்கள் பெற்றோர்களின் காப்பீட்டில் பலன் பெற முடியும்.
 
50 பேருக்கும் குறைவாக பணியாளர்களைக் கொண்ட நிறுவனங்கள் தங்கள் ஊழியர்களுக்கு காப்பீடு வழங்குவதன் மூலம் வரி சலுகை பெறமுடியும்.
 
மெடிக்கேர் பலணாளர்களின் வருமான வரம்பு உயர்த்தப்பட்டிருக்கிறது. இதனால் பல , கிட்டதட்ட 20 மில்லியன் 65 வயதுக்கு மேலானவர்கள் பலன் பெற முடியும்.
 
65 வயதுக்கு மேற்பட்டவர்கள் 50% வரை பரிந்துரைக்கப்பட்ட Brand மருந்துகள்இல் தள்ளுபடி பெற முடியும். எப்போது எத்தனை தள்லுபடி என்பது இங்கே http://www.healthcare.gov/law/full/index.html கொடுக்கப்பட்டிருக்கிறது.
 
அமெரிக்காவில் நிறைய பேர் நீண்டகால பாதிப்பைத்தரும் நோய்களான இரத்த அழுத்தம், நீரிழுவு, உடல் பருமன் ஆனதா வரக்கூடிய நோய்கள், மூட்டு வலி போன்றவற்றால் பாதிக்கப்பட்டிருக்கிறார்கள் இதனை குறைக்க அல்லது ஆரம்ப காலத்திலேயே தடுக்க தேவையான சிகிச்சை முறைகள் முற்றிலும் இலவசமாக இருக்கிறது.
 
சமுதாய உடல்நல பாதுகாப்பு மையங்கள் ஏற்படவும் வழிவகுக்கப்பட்டிருக்கிறது. பொதுநலத்திற்காகவும் நிதி ஒதுக்கப்பட இருக்கிறது. 
 
இந்த மாற்றத்தினால் பல நல்ல பலன்கள் இருக்கிறது. ஆனாலும் இதில் இருக்கும் சில குறைபாடுகளில் முக்கியமான ஒன்று மனநல பாதுகாப்பிற்கு அல்லது கவுன்சிலிங் போன்றவற்றிக்கான காப்பீடு எப்படி, எத்தனை முறை கவுன்சிலிங் பெற முடியும்< முற்றிலும் இலவசமா என்பது போன்ற கேள்விகளுக்கு நல்ல விளக்கம் இல்லை. அதேபோல அபார்ஷன், அல்லது செயற்கை முறையில் கருத்தரித்தல் போன்றவற்றின் செலவினங்களுக்கும் காப்பீடு எத்தனை முறை பலன் தரும் என்பது போன்றவையும் விளக்கப்பட இல்லை.
 
வாகனங்களுக்கு கட்டாயமாக காப்பீடு அவசியம். குறைந்த பட்ச காப்பீடு இல்லாமல் வாகனங்களை ஓட்டுவது சட்டப்படி குற்றம். அதேபோல வீட்டுக்கு சொந்தக்காரராக இருந்தால், வீட்டைப்பாதுகாக்க காப்பீடு சட்டப்படி அவசியம். அப்போதெல்லாம் எதிர்ப்பு தெரிவிக்காத குடியரசு கட்சியை சேர்ந்தவர்கள் அரசியல் காரணங்களுக்காக இதை எதிர்ப்பது சரியில்லை. மக்களை கட்டாயமாக காப்பீடு வாங்கச் சொல்வது அவர்களின் தனிமனித உரிமையில் தலையிடுவது போலாகும் என்று எதிர்ப்பவர்கள் பலரும் நடுத்தர வர்க்கத்தைச் சேர்ந்தவர்கள் இல்லை. 
 
இரண்டாவதாக இவர்கள் சொல்லும் காரணம் காப்பீடுகள் மாதக்கட்டணம் இன்னும் அதிகாகும் என்பதாகும். முறையாக அரசாங்கத்தால் நடத்தப்படும் எக்சேஞ்சில் அவரவர் தகுதிக்கேற்ப காப்பீடு பெற்றுக்கொள்ளலாம், இரண்டாவதாக நோய்களை தடுக்கும் சிகிச்சைகள் முற்றிலும் இலவசமாக இருப்பதால் உடல்நல நோய்களை தீர்க்க பராமரிக்க ஆகும் செலவு குறைய கூடும், அதனாலும் கட்டணம் குறையவே வாய்ப்பு உண்டு.
 
நல்ல ஆரோக்கியமான ஒரு இளைஞன் எதற்காக அநாவசியமாக காப்பீடு வாங்கிக்கொள்ள வேண்டும், பயன்படுத்தவே தேவையிலை என்று சொல்பவர்கள் உண்டு. இப்போதைய முறையில் பலரின் செயற்கை முறை கருத்தரித்தல், நீண்டகாலம் செயற்கை முறை மருத்துவ உதவியுடன் ஒருவரை உயிரோடு வத்திருக்க ஆகும் செலவும என எல்லாமே ஒரு வகையில் காப்பீட்தின் கட்டணத்தை அதிகரிக்க எல்லா பயனர்களும் அதை பகிர்ந்து கொள்ளவே செய்கின்றனர். ஒரு சமுதாயத்தில் வாழும் ஒவ்வொருவரும் சில சமயங்களில் சில பொதுவான சட்டங்களுக்கு உட்பட்டே ஆகவேண்டும். மேலும் உடல்நலம் எப்போது எதனால் பாதிக்கபடும் என்பதும் நிச்சயமாக சொல்ல இயலாது. எனவே இத்தகைய இளைஞர்கள் மிக குறைந்த தேவைக்கான காப்பீட்டை பெற்றுக்கொள்ளலாம்.
 
என்னைப் பொறுத்தவரை பலகாலமாக பேசப்பட்டு வந்த ஒரு மாற்றம் வந்திருக்கிறது. இப்போதைய உடல்நல திட்டம் நிறைய குறைகளோடு இருக்கிறது. புதிய திட்டத்தை வரவேற்றுப் பரிசோதிப்பதில் தவறொன்றும் இல்லை. இதிலும் இன்னும் மாற்றங்கள் வேண்டும் என்றால், அதைச் சட்டபூர்வமாக செய்து கொள்வதில் தடை எதுவும் இல்லை.

Leave a Reply

Your email address will not be published. Required fields are marked *

கடைசியாக : July 5, 2012 @ 4:27 pm