Tamiloviam
ஆகஸ்ட் 16 2007
தொடர்கள்
யுனிகோடில் தேடல்
சென்ற இதழ்கள்
பேட்டி : திரு. சத்தி. சக்திதாசனுடன் இ-நேர்காணல் - இறுதி பாகம்
- திருமலை கோளுந்து [golundhu1979@yahoo.com]
| | Printable version | URL |

இலங்கையில் உள்ள தமிழர்களுக்கு நியாயமான தீர்வு கிடைத்து, எனது நாட்டு மக்கள் தங்கள் இன்னல்களை மறந்து இனிய வாழ்க்கை வாழ்வேண்டும் என்பது எனது கனவு மட்டுமல்ல அனைத்து புலம்பெயர் தமிழ் மக்களினதும் கனவாகும். அது எத்தகைய தீர்வாக அமைய வேண்டும் என்று சொல்வதர்கு எனக்கு எதுவித தகுதியும் கிடையாது.

தமிழோவியம் :- பொதுவாக பிரபலங்களுடன் சாதாரணமாக பேசிக்கொண்டிருக்கும் பொழுது இருக்கின்ற ஒரு யதார்த்தம், அதுவே பேட்டி என்று வரும் பொழுது பேட்டி காண்பவரும், பேட்டி கொடுப்பவரும் ஒரு இறுக்கத்திற்குள்ளே சிக்க வேண்டிய சூழல் வந்து விடுகிறது. இதனை நான் பல முறை உணர்ந்திருக்கிறேன். தங்களுக்கு இம்மாதிரி உணர்வு வந்தது உண்டா ?

நிச்சயமாக . சாதரணமாக நாம் பேசிக் கொண்டிருக்கும் போது எதையும் பேசலாம், ஒன்றிலே ஆரம்பித்து மற்றொன்றுக்குத் தாவலாம். ஆனால் பேட்டி என்று வரும்போது, நாம் கேட்கும் கேள்வியைச் சுற்றி ஒரு வலயத்தைப் போட்டுக் கொள்ள நிர்ப்பந்திக்கப்படுகின்றோம். இந்த வலயத்துக்கு வெளியே செல்லும் போது மிகவும் சாமர்த்தியமாக திரும்பவும் அந்த வலயத்துக்குள்ளே பேட்டி கண்பவரை அழைத்து வர வேண்டியவர்களாகின்றோம்.

இது எம்மையறியாமலே ஒரு இறுக்கமான சூழ்நிலையைத் தோற்றுவிக்கும். இதை இலகுவாக்குவதற்குரிய சாமர்த்தியத்தை அனுபவத்தின் மூலமே பெற்றுக்கொள்ள முடியும்.

தமிழோவியம் :- சில ஆண்டுகளுக்கு முன்பு கவிஞர் வைரமுத்துவை தாங்கள் எடுத்த நேர்காணல் அருமையான ஒன்று. தாங்கள் எடுத்து தங்களுக்கு பிடித்த நேர்காணல்கள் குறித்து?

நான் எடுத்த அனைத்து நேர்காணல்களுமே எனது மனதைத் தொட்டவையே. ஆனால் அவற்ரில் சில சில காரணங்களுக்காக எனது மனதில் மிகவும் ஆழப்பதிந்தவை.

ஆனால் நான் எடுத்து , அவை நேர்காணல்கள் வடிவில் வெளிவராமல் போனவை சில இருக்கின்றன. அவைகளை நான் சந்தித்தவர்கள் பட்டியலில் கட்டுரையாக வெளிவிடும் உத்தேசமுள்ளது. குறிப்பாக கவிஞர் வாலி, வானதி திருநாவுக்கரசு ஜயா, ஞானபீட விருது பெற்ற என் உள்ளம் நிறைந்த எழுத்தாளர் திரு ஜெயகாந்தன் ஆகியோர் அடங்குவர்

தமிழோவியம் :- இன்றைய காலக்கட்டத்தில் கவிதை என்பதற்கு தங்களின் இலக்கணம் என்ன?

கவிதை என்றால் என்ன? மிகவும் அருமையான, அடிக்கடி கேட்கப்படும் கேள்வி. ஆனால் இதற்கு இலக்கியரீதியாகப் பதிலளிக்கக்கூடிய அருகதை எனக்கில்லை என்பதுவே உண்மை.

கவிதை என்பதற்கு என் மனத்தளவில் நான் கொண்டிருக்கும் விளக்கம் உண்டு. இதயம் என்பது ஒரு நாடகமேடை. அதில் இடைவிடாது பலநாடகங்கள் தொடர்ந்து அரங்கேறியவண்ணம் உள்ளது. அந்தநாடகத்தின் காரணமாய் பல உணர்வுகள் இதயத்தின் ஓரத்தை உரசிச் செல்கின்றன. ஒவ்வொருவருடைய வாழ்க்கையின் அடிப்படையிலும் இந்நிகழ்வுகளை நாம் ஒவ்வொருவரும் வித்தியாசமாக விமர்ச்சிக்கின்றோம். அந்த விமர்சனத்தைக் கோர்வையாக்கி அனைவர்கும் புரியக்கூடிய வகையில் கொஞ்சம் மொழியழகும் சேர்த்து கொடுப்பதே அடிப்படைக் கவிதை என்பது எனது கருத்து.

கவிதையில் புதுக்கவிதை, மரபுக்கவிதை, ஹைக்கூ, வசனக்கவிதை எனப்பல ராகங்கள் உண்டு. மரபுக்கவிதையத் தவிர்ந்த ஏனையவை கவிதைகள் அல்ல என்று மறுப்பவர்களும் உண்டு. இந்த வகையான நிராகரிப்பு வளரும் தலிமுறையை கவிதையை விட்டு ஒதுக்கிவிடும் தன்மை வாய்ந்தது என்றே எண்ணுகிறேன். கவிதைகளில் கற்பனை இருக்க வேண்டும், யதார்த்தம் இருக்க வேண்டும், நகைச்சுவை இருக்க வேண்டும்.

அழகிய இலக்கிய, இலக்கண மரபுகளோடு கவிதைகள் எழுதுவோரை ரசித்து, மதிப்பவன் நான். அவர்களின் அத்தகைய இலக்கிய அரிவை அடைய வேண்டும் என்னும் குறிக்கோள் உடையோன் நான்.

அதேசமயம் மனதில் தோன்றுவதை எளிமையாக, அனைவர்க்கும் புரியக்கூடிய வகையில் கவிதையாக படைப்பது மிகவும் அற்புதமான திறமை என்பதை யாரும் மறுக்க முடியாது.

கவிதை இதுதான், இலக்கியம் இதுதான் என்ரு எமது மொழிக்குத் தாழ்பாள் போட்டுவிட்டாள் காலத்தின் மாற்றத்தை அனுசரித்து எமது மொழியின் வளர்ச்சி தடைப்பட்டுவிடும் என்பது எனது கருத்து. இளம் தலைமுறையை கவிதை, கட்டுரை, சிறுகதை என்னும் திடலுக்குள் இழுக்க வேண்டுமானல் அவை அவர்களின் தலிமுறைக்குள் சம்மந்தப்படுத்தப்பட வேண்டும். இதற்கு கணணி மிகப்பெரும் துணையாக இருக்கிறது,. இருக்கும்.

தமிழோவியம் :- இலக்கியம் என்பது ஒரு வகை மொழி விளையாட்டு. அதில் அறிவார்ந்த பேச்சுக்கள், கருத்துக்கள் முன் வைக்கப்படுகின்றன என சொல்லப்படுகிறது. இதனால் ஏதாவது தெளிவு நிலை தமிழ் சமூகத்திற்கு கிடைத்திருப்பதாக எண்ணுகிறீர்களா?

நான் முந்தைய கேள்விக்கு அளித்திருந்த விடை இதற்கும் பொருந்தும். தமிழ்ச் சமூகத்தின் முன்னேற்றத்துக்கு இலக்கியம் மிகவும் இன்றியமையாதது. முகவரி இல்லாமல் ஒருவனால் சமூகத்தில் எவ்வாறு வாழமுடியாதோ அத்தகைய முக்கியம் வாய்ந்தது இலக்கியம்.

ஆனால் அந்த இலக்கியம் எவ்வகையில் சமூகத்தின் மத்தியில் எடுத்துச் செல்லப்படுகின்ரது என்பதைப் பொறுத்தே அச்சமூகத்தின் முன்னேற்றத்தில் அதன் பங்கு நிர்ணயிக்கப்படும்.

வளரும் தலிமுறையின் தேவைகளைப் பிரதிபலிப்பதாக இலக்கியம் அமையவேண்டும். எமது சமூகத்தின் கலாச்சாரங்கள் சுமையாக ஏற்றப்படாமல், சுகமாக ஏற்றப்படவேண்டும். மாற்றங்களை துணிச்சலுடன் ஏற்றுக்கொண்டு அதைப் பக்குவமாக இலக்கியத்துடன் இணைத்துக் கொள்ளவேண்டும். தர்காலத்தில் எமது சமூகம் உலகம் முழுவதும் பரந்து வியாபித்திருக்கின்றது. அந்தந்த நாட்டுச் சூழல்களுடன் எப்படி எமது கலாச்சாரங்களை பினைத்து, நாமும் அந்தநாட்டின் பிரஜைகளாக வாழும் டம்காலப் பதிவுகள் இலக்கியத்தின் மூலம் பதிவு செய்யப்படவேண்டும். தாய்நாட்டின் தமிச்சமூகத்திர்கும், புலம்பெயர் நாட்டின் தமிழ்ச்சமூகத்திற்கும் இலக்கியம், மொழி தான் பாலமாகச் செயல்பட்டுக்கொண்டிருக்கின்றது, இனியும் இருக்கும்.

இதன் தொடர்ச்சியான வளர்ச்சி புலம்பெயர் மக்கள் அந்தந்த நாட்டு மொழிகளில் எமது கலாச்சாரத்தை, இலக்கியத்தை எடுத்துச் செல்வதன் மூலமே ஆரோக்கியமானதாக அமையும் என்பது எனது கருத்து.

தமிழோவியம் :- நீங்கள் எந்த காலக்கட்டத்தில் இலங்கையில் இருந்து லண்டனுக்கு சென்றீர்கள்? லண்டனை தேர்ந்தெடுத்து வசிப்பதற்கு ஏதேனும் காரணங்கள் இருக்கிறதா?

நான் 1975ம் ஆண்டு ஜனவரி மாதம் ஈழத்திலிருந்து லண்டன் சென்றேன். லண்டன் சென்றதுக்கு முக்கிய காரணம் எனது பொறுப்பின்மை என்றேதான் சொல்லுவேன். யாழ்ப்பாணத்தில் கல்விப்பொதுத்தராதர உயர்தர வகுப்பில் கல்வி பயின்று கொண்டிருந்த நான், கல்வியில் அதிக கவனம் செலுத்தாமல் காலத்தை விரயமாக்கிய காரணத்தால், எதிர்காலச் சுபீட்சத்துக்கு ஒரே வழி லண்டனுக்கு சென்று உயர்கல்வி கற்பதுதான் என்ற முடிவில் எனது தாய்மண்னைப் பிரிந்து லண்டன் சென்றேன்.

லண்டனை தேர்ந்தெடுத்ததுக்கு முக்கிய காரணம், எனது நண்பர்கள் பலர் அங்கே சென்றதுவும், தமிழுக்கு அடுத்தபடியாக நானறிந்த மொழி ஆங்கிலம் என்பதாலுமேயாகும்

தமிழோவியம் :- தங்கள் மனதில் பதிந்த, அழியாத, அபூர்வமான காட்சிகளைப் பற்றி?

என் மனதில் இன்றும் அழியாது பதிந்து நிற்கும் காட்சிகள் இரண்டு.

1) நான் ஈழத்தை விட்டு லண்டனுக்கு வருவதற்கு முதல்நாள் இரவு நானும் எனது உயிர் நண்பனும் யாழ்ப்பாணம் நல்லூர் கோவில் வீதியில் இருந்து, எமது கடந்தகாலம், எதிர்காலம் என்பதைப் பற்றிப் பேசிக்கொண்டிருந்து விட்டு எழுந்து உடைகளில் ஒட்டியிருந்த மணலைத் தட்டிவிட்டு புறப்பட்ட காட்சி.

2) சென்னையில் எனது ஒரு விடுமுறையின் போது தகிக்கும் உச்சி வெய்யிலில் நடக்க முடியாது நடந்து கொண்டிருக்கும் போது, சென்னை நகரின் அண்ணாசாலையில் அத்தனை இரைச்சல்களுக்கு மத்தியில் ஓடிக்கொண்டிருந்த ஒரு மணல் லாரியில் மேனியில் சட்டையின்றிக் கைலியுடன் தன்னை மரந்து தூங்க்கிக் கொண்டிருந்த அந்தத் தொழிலாளியின் அமைதியான, ஆழ்ந்த தூக்கம்.

தமிழோவியம் :-  இலங்கை தமிழ் மக்களின் நாடு நிலைப்பட்ட வகிபாத்துக்கான அரசியல் வரைவிலக்கணம் வழங்கப்படுவதற்கு உரிய நடவடிக்கை எடுக்கப்பட்டிருந்தால், தமிழ் மக்களின் அரசியல் கோரிக்கைகள் இன போராட்டமாக மாறியிருக்க வேண்டிய அவசியமில்லை என கா.சிவதம்பி இலங்கை தமிழர்களின் போராட்டத்தை பற்றி சொல்லியிருக்கிறார். ஆனால் இந்தக் கருத்தை தமிழகத்தில் சிலர்  மறுக்கிறார்கள். அவர்களின் இந்த மறுப்பு  நீங்கள் தரும் பதில் என்ன?

நான் முன்பு கூரியது போன்ரு நான் அரசியல் அதிர்வு முதிர்ந்தவன் அல்ல. ஈழத்தில் தமிழர்களுக்கு நியாயமான உரிமைகள் உரியகாலத்தில் கிடைத்திருந்தால் உயிரிழப்புக்கள் தவிர்ந்திருக்கும் என்பதில் எவருக்கும் மாற்றுக்கருத்து இருக்கமுடியாது என்பது எனது கருத்து.

தமிழோவியம் :- புலம் பெயர்ந்த தமிழர்கள் தங்களுடைய நினைவுகளை உறைந்த நிலையில் தான் வைத்திருக்கிறார்கள். தங்களுடைய தாயகத்தை எங்கிருந்தாலும் பூனிதமாக கருதுகிறார்கள். வெயிலில் நிழலைத் தேடுவது போல எங்களுடைய தேடல் நீடிக்கிறது என ஈழத்துக் கவிஞர் கி.பி.அரவிந்தன் சொல்லி இருக்கிறார். இந்த கருத்தில் நீங்களும் உடன்படுவீர்கள். இது குறித்து நீங்களும் கொஞ்சம் பேசுங்களேன்?

தாயகத்து நினைவுகள் என்றுமே உறைந்த நிலையில் தான் இருக்கின்றன. என்னுடைய சொந்த வாழ்க்கையின் அடிப்படியில் பார்த்தால், நான் தாயகத்தில் வாழ்ந்த காலங்கள், இப்போதைய சூழலுடன் ஒப்பிடும் போது அமைதியான காலங்கள். அப்போது காலேஜில் படிக்கும் ஒரு இளைஞனாக. அவர்களுக்கே உரிய அத்தனை லூட்டிகளையும் அடித்து வாழ்க்கையை வசந்தமாக ஓட்டியவன். அந்த நினைவுகள் என்னைப் பொறுத்தவரை பொன்னான நினைவுகள். அவை மறைந்து போனால் நான் மனிதனாக இருப்பதில் அர்த்தமில்லை. நிச்சயமாக எங்களுடைய இதயத்தில் ஆழ்ந்து உறங்கும் ஏக்கங்களுக்கு விடைகளைத் தேடியவண்ணமே காலம் ஓடுகின்றது. நான் தவழ்ந்த தாய்மண், எனக்குத் தமிழ் தந்த தூயமண் அது என்ருமே எனக்குப் புனிதமானது.

தமிழோவியம் :- இலங்கையில் தனி ஈழம் கிடைத்து விடும் என்ற நம்பிக்கை தங்களிடம் எந்த அளவில் இருக்கிறது? தனி ஈழம் பற்றிய எந்த ஒரு கவலையும், ஆர்வமும் இல்லாத ஒரு புதிய ஈழத் தமிழர்களின் தலைமுறை உருவாகி விட்டதாக சொல்லப்படுகிறது. இது எல்லாம் வ்¢டுதலைப் புலிகளுக்கு பாதகமான விஷயங்களாக இருக்குமா? இருக்காதா?

இலங்கையில் உள்ள தமிழர்களுக்கு நியாயமான தீர்வு கிடைத்து, எனது நாட்டு மக்கள் தங்கள் இன்னல்களை மறந்து இனிய வாழ்க்கை வாழ்வேண்டும் என்பது எனது கனவு மட்டுமல்ல அனைத்து புலம்பெயர் தமிழ் மக்களினதும் கனவாகும். அது எத்தகைய தீர்வாக அமைய வேண்டும் என்று சொல்வதர்கு எனக்கு எதுவித தகுதியும் கிடையாது.

எனது சொந்தவாழ்க்கையை மேம்படுத்திக் கொள்வதற்காகத் தாய்நாட்டை விட்டு வந்தவன் நான். அங்கே இன்னல் படும் மக்களில் ஒருவனாகவோ அன்றி தமது உயிர்களை இழந்து கொண்டிருக்கும் சகோதரர்களில் ஒருவனாக இல்லாமல், வெளிநாட்டில் வசதியாக வாழ்ந்து கொண்டு, அவர்களின் விதியை நிர்ணயிக்கும் முடிவுகளைப் பற்றிப் பேசும் அருகதை எனக்குக் கிடையாது. அதுதவிர அது எந்தவிததிலும் நியாயமுமாகாது.

தமிழோவியம் :- ஈழத்து எழுத்தாளர்களில் நீங்கள், அ.முத்துலிங்கம், சேரன், இளைய அப்துல்லாஹ், கி.பி.அரவிந்தன், ஷோபா சக்தி போன்றவர்கள் முக்கியமானவர்கள். இவர்களின் எழுத்துக்கள் தமிழகத்தில் பரவலாக வசிக்கப் படுகின்றன. தமிழக எழுத்தாளர்களில் தங்களை பாதித்தவர்கள் குறித்து?

தமிழகத்து எழுத்தாளர்கள் அனைவருமே எனக்கு வழிகாட்டிகளாகத்தான் இருக்கிறார்கள்.

புரட்ச்சிப் புலவன் பாரதி முதற்கொண்டு, சமீபத்திய இளம் எழுத்தாளர்கள் வரை அனைத்து எழுத்தாளர்களின் படைப்புகளையும், சந்தர்ப்பம் கிடைக்கும் போது படிப்பது வழக்கம். குறிப்பாக இன்ரைய இளம் கவிஞர்களின் அதீத திறமை என்னைப் பலசம்யங்களில் வியக்க வைத்திருக்கின்றன.

இணையக்குழுமங்கள், இதழ்கள் அனைத்திலும் தமது ஆக்கங்களைப் படைத்து வரும் அனைத்து எழுத்தாளர்களும் அற்புத படைப்பாளிகளே.

தமிழோவியம் :- சமீபத்தில் மறைந்த ஈழத்து பெண் கவிஞர் சிவமணி பற்றி தங்கள் கருத்து என்ன? 22 வயதில் தற்கொலை செய்து கொள்ளும் அளவிற்கு, அவருக்கு என்ன நெருக்கடி இருந்திருக்கும்? அவர் தற்கொலைக்கு முன் தனது கவிதைகளை தீ வைத்து கொளுத்தி விட்டார் என சொல்லப்படுகிறதே?

மறைந்த கவிதாயினிக்கு எனது அஞ்சலிகளைத் தெரிவித்துக் கொள்கிறேன். இது தவிர இந்த விடயத்தில் எனக்கு கருத்துச் சொல்லுமளவிற்கு இதைப்பற்றி அறிந்திருக்கவில்லை என்பதுவே உண்மையாகும்

தமிழோவியம் :- தமிழ் திரைப்படங்களை பார்ப்பதுண்டா? தமிழ் திரைப்படங்கள் குறித்து தங்களின் மதிப்பீடு என்ன?

நிச்சயமாகப் பார்ப்பேன். ஆனால் வரும் திரைப்படங்கள் அனைத்தையுமே பார்ப்பதில்லை. தமிழ்த்திரைப்படங்களித் திரைப்படங்கள் என்னும் ரீதியில் பார்ப்பது மட்டுமே ஆரோக்கியமாக இருக்கும். அது தவிர அவற்றைப்பற்றிச் சர்சைகளில் ஈடுபடுவது பலனளிக்காது எனப்து எனது கருத்து.

தமிழோவியம் :- தங்கள் இரண்டு மாதத்திற்கு ஒரு முறை நடத்தும்  இத'ழ் குறித்து? இது ஒரு மாறுபட்ட முயற்சி. இப்படிப்பட்ட இதழை நடத்த வேண்டும் என தங்களூக்கு எண்ணம் எப்படி வந்தது?

இது எனது தாகம். ஒவ்வொரு இதழ்களிலும் இருந்து எனக்குப் பிடித்த பகுதிகளைக் கோர்வையாக்கி யாராவது தரமாட்டார்களா என நான் ஏங்கியதுண்டு. கையிலே தூக்கி படிக்க வேண்டும், கண்ணயரும் போது அப்படியே போட்டு விட்டுத் தூங்கவேண்டும். இப்படியான ஒரு இதழ் வேண்டும் என்பது எனது தாகமாக இருந்தது. அதற்கு கிடைத்த விடைதான் இந்த இதழ். ஆரம்பிக்கும் போது நெருங்கிய நண்பர்கள் , உறவினர்கள் மத்தியில் ஓடவிட்டுப் பார்த்தேன். வரவேற்றார்கள். தொடர்ந்து செய் என்று ஊக்குவித்தார்கள். அதன் விளைவே " தமிழ்ப்பூங்கா "

இதில் அரசியல் கிடையாது, சினிமா கிடையாது. தமிழ், தமிழ் சார்ந்தவர்கள், சிறுகதை, கவிதை எனப் பல அம்சங்களை உள்ளடக்கி இலவசமாக மின்னஞ்சலில் விநியோகிக்கப்படுகிறது. கவிஞர் வாலி, கவிஞர் வைரமுத்து, அண்ணன் அப்துல் ஹமீது என பலரும் முதுகில் தட்டிக் கொடுத்து தமது ஆக்கங்களைப் பயன்படுத்த அனுமதியும் கொடுத்தார்கள். பல இளம் எழுத்தாளர்களின் கவிதைகளைப் பிரசுரிக்க ஆரம்பித்துள்ளேன். இது இரு நாட்டு எல்லைகளைக் கடந்த, மொழியால் இணைக்கப்பட்ட இதழாக அமைய வேண்டும் என்பதே எனது இலட்சியம்.

இந்தச் சாதரணமானவனின் கருத்துக்களை அச்சேற்ற ஒரு சந்தர்ப்பமளித்த உங்களுக்கும், தமிழோவியத்துக்கும், அனைத்து வாசக் அன்பு உள்ளங்களுக்கும் எனது தாழ்மையான வணக்கமும், நன்றிகளும் உரித்தாகட்டும்.

| | |
oooOooo
                         
 
திருமலை கோளுந்து அவர்களின் இதர படைப்புகள்.   பேட்டி பகுதியில் வந்த இதர படைப்புகள்.
PROVIDER=MICROSOFT.JET.OLEDB.4.0;DATA SOURCE=G:\PleskVhosts\tamiloviam.com\httpdocs\unicode\db\TOcomments.mdb;Persist Security Info=False;
உங்கள் கருத்து  
(You may need to disable your pop-up blocking software in order to post a comment.)
Copyright © 2001 - 2007 Tamiloviam.com (subsidary of Oviam LLC)- Authors
Best viewed with IE 4.x and above, Netscape 7.2, Firefox 0.8 and above with resolutions 800 X 600 and above.
| Disclaimer |   | Privacy |